Nga Agron Brataj
Qendrat Shëndetësore Verore në Vlorë në gadishmëri për ofrimin e kujdesit shëndetësor
Në prag të sezonit turistik dhe me rritjen e fluksit të vizitorëve në qytetin e Vlorës, Qendrat Shëndetësore Verore janë vënë në gadishmëri të plotë për të garantuar ofrimin e shërbimeve mjekësore për çdo rast emergjence apo nevojë shëndetësore.
Strukturat shëndetësore janë të pajisura me ekipet e nevojshme mjekësore, infermierë dhe mjetet bazë për dhënien e ndihmës së shpejtë, duke ofruar mbështetje të menjëhershme për pushuesit, qytetarët dhe turistët që zgjedhin Vlorën për të kaluar pushimet e verës.
Qendrat verore do të jenë të hapura përgjatë gjithë sezonit, kryesisht në zonat bregdetare dhe turistike, ku fluksi i njerëzve është më i lartë. Ndërhyrjet e shpejta, trajtimi i rasteve urgjente, si dhe këshillimi mjekësor janë shërbimet kryesore që ofrohen në këto qendra.
Autoritetet lokale dhe ato shëndetësore bëjnë thirrje që në rast nevoje, qytetarët dhe turistët të drejtohen pranë qendrës më të afërt shëndetësore, duke theksuar se qëllimi kryesor është garantimi i sigurisë dhe mirëqenies së çdo vizitori gjatë gjithë sezonit.
