Nga Agron Brataj
Tampere, Finlandë
Një tjetër faqe e artë në historinë e atletikës italiane është shkruar nga Kelly Doualla Edimo. Sprinterja e re, vetëm 15 vjeç, ka fituar medaljen e artë në garën e 100 metrave për femra në Kampionatin Evropian U20 të atletikës që po zhvillohet në Tampere të Finlandës, me kohën e shkëlqyer 11.21 sekonda.
Një paraqitje mbresëlënëse dhe një fitore pa diskutim për talenten e re nga Lombardia, e cila la pas të gjitha rivalet e saj me një diferencë të dukshme. Për Doualla, ky është suksesi i parë ndërkombëtar në një garë kaq prestigjioze, duke u konfirmuar si një nga shpresat më të mëdha të atletikës evropiane.
Në garë mori pjesë edhe italiania tjetër, Alice Pagliarini, e cila u rendit në vendin e katërt, pas një kualifikimi emocionues në finale si e dyta me kohën më të mirë ndër të kualifikuarat (11.72 sekonda).
Doualla, e cila tashmë mban rekordin kombëtar për grupmoshat U18 dhe U20, dhe renditet e treta në historinë e Italisë për femra në 100 metra pas Zaynab Dosso dhe Manuela Levorato, u prezantua në këtë kampionat si favorite absolute dhe nuk zhgënjeu.
Në finalen e zhvilluar në pistën e Tampere-s në orën 19:40 me orën lokale, ajo garoi në korsi 6 dhe la pas emra të njohur si gjermanet Philina Marianne Schwartz dhe Anne Boecker, britanikja Mabel Akande (11.48) dhe ukrainasja Uliana Stepaniuk (11.50).
Pavarësisht moshës së saj shumë të re, Kelly tregoi përgatitje fizike superiore dhe një përqendrim të jashtëzakonshëm.
Me një sezon fantastik pas vetes dhe një margjinë të madhe për përmirësim, Kelly Doualla shihet tashmë si një yll në ngjitje i atletikës botërore. Italia ka një kampione të re për të cilën do të flitet gjatë.
