Nga Agron Brataj
Shpërthime dhe zjarre të shumta kanë goditur zona ushtarake në zonën metropolitane të Karakasit në orët e para të ditës. Qeveria e Venezuelës ka denoncuar atë që e quan një “agresion ushtarak shumë të rëndë” nga Shtetet e Bashkuara. Presidenti Nicolás Maduro ka shpallur gjendjen e emergjencës dhe ka bërë thirrje për “mobilizimin” e popullsisë, duke deklaruar se vendi do t’i rezistojë sulmeve.
Në lagjen 23 de Enero, në perëndim të Karakasit, është raportuar një shpërthim i fuqishëm i shoqëruar me sirena dhe fluturime avionësh. Incidente janë regjistruar edhe në Akademinë Ushtarake të Mamos, në La Guaira (rreth 40 km nga kryeqyteti), si dhe në baza të tjera, përfshirë bazën ajrore La Carlota dhe aeroportin e Higuerotes, ku shpërthimet kanë qenë më të vogla.
Sipas një njoftimi zyrtar, qeveria e Maduros akuzon Uashingtonin se synon të marrë nën kontroll burimet strategjike të Venezuelës, veçanërisht naftën dhe mineralet, dhe të imponojë një “ndryshim regjimi”. “Kjo përpjekje do të dështojë,” thuhet në deklaratë, duke theksuar mbrojtjen e sovranitetit dhe të drejtës për vetëvendosje.
Shpërthimet ndodhën ndërsa presidenti amerikan Donald Trump kishte paralajmëruar mundësinë e veprimeve ushtarake kundër Venezuelës dhe kishte deklaruar se ditët e Maduros ishin “të numëruara”. Media amerikane, përfshirë CBS News dhe Fox News, raportuan se sulmet ishin urdhëruar nga Trump dhe kishin në shënjestër objekte ushtarake, duke cituar zyrtarë anonimë.
Në rrjetet sociale janë shpërndarë pamje të zjarreve dhe kolonave të tymit, megjithëse vendndodhja e saktë e disa shpërthimeve mbetet e paqartë. Banorë të lagjeve si El Junquito, La Pastora, Macarao, El Hatillo, El Marqués dhe Los Ruices raportuan zhurma të forta dhe shpërthime. Disa zona të qytetit kanë mbetur pa energji elektrike; ndërprerjet u konfirmuan edhe nga gazetarë të huaj në terren, të cilët raportuan gjithashtu zhurma avionësh pas shpërthimeve.
