Virusi Nipah po rikthen vëmendjen e autoriteteve shëndetësore ndërkombëtare, pas konfirmimit të dy rasteve në Indi, konkretisht në shtetin e Bengalit Perëndimor. Sipas një raporti të Organizatës Botërore të Shëndetësisë (OBSH), aktualisht rreziku për Europën vlerësohet i ulët, por qytetarët këshillohen të tregojnë kujdes, veçanërisht gjatë udhëtimeve.
Dy rastet e konfirmuara janë punonjës shëndetësorë të të njëjtit spital privat në qytetin Barasat (distrikti North 24 Parganas). Njoftimi zyrtar i është dërguar OBSH-së më 26 janar, ndërsa infeksioni është konfirmuar nga Instituti Kombëtar i Virologjisë në Pune më 13 janar.
Njëri nga pacientët ndodhet ende nën ventilim mekanik që prej 21 janarit, ndërsa pacienti tjetër ka shfaqur simptoma të rënda neurologjike, por gjendja e tij është përmirësuar. Autoritetet indiane kanë identifikuar dhe testuar mbi 190 kontakte, të cilat kanë rezultuar negative ndaj virusit.
“Deri më tani nuk janë identifikuar raste të tjera”, njofton OBSH. Sipas vlerësimit të saj, rreziku nga virusi Nipah është i ulët në nivel kombëtar, rajonal dhe global, ndërsa i moderuar në nivel lokal. Për këtë arsye, nuk rekomandohen kufizime për udhëtime apo tregti.
Ky është fokusi i tretë i virusit Nipah i regjistruar në Bengalin Perëndimor, pas atyre të raportuara në Siliguri në vitin 2001 dhe Nadia në vitin 2007. Për të parandaluar përhapjen e mëtejshme, autoritetet kanë vendosur masa të shtuara survejimi, parandalimi dhe kontrolli të infeksionit, ndërkohë që vijojnë hetimet për burimin e infektimit.
Çfarë është virusi Nipah
Virusi Nipah është një zoonozë e rrallë, por shumë e rrezikshme, e cila transmetohet te njerëzit nga kafshë të infektuara, kryesisht lakuriqë nate, ose përmes ushqimeve të kontaminuara me pështymë, urinë apo feçe të kafshëve. Virusi mund të përhapet edhe nga njeriu te njeriu, përmes kontaktit të ngushtë.
Aktualisht nuk ekzistojnë vaksina apo barna të autorizuara kundër virusit Nipah. Megjithatë, trajtim mbështetës i hershëm mund të përmirësojë ndjeshëm mbijetesën e pacientëve. Për rastet e rënda rekomandohet terapi intensive, veçanërisht për komplikacionet respiratore dhe neurologjike.
OBSH thekson se parandalimi mbetet mjeti kryesor për kufizimin e infeksionit, përmes informimit të popullatës mbi faktorët e rrezikut, shmangies së kontaktit me kafshë të egra dhe respektimit të masave të kontrollit të infeksioneve në ambiente shëndetësore.
Kujdes i veçantë kërkohet edhe gjatë mbledhjeve masive dhe udhëtimeve ndërkombëtare, ku individë nga vende të ndryshme mund të mos jenë të informuar mbi mënyrat e transmetimit dhe mbrojtjes nga virusi.
Autoritetet shëndetësore ndërkombëtare theksojnë se vigjilenca mbetet thelbësore, ndërsa monitorimi global i emergjencave virale vazhdon.
