Një shpërthim i dyshuar i hantavirusit është regjistruar në bordin e anijes turistike Hondius, e cila ka hyrë në portin Granadilla në ishullin e Tenerife. Pamjet e transmetuara nga televizioni publik spanjoll RTVE tregojnë se anija ka hedhur spirancën brenda portit, ndërsa autoritetet po përgatiten për një procedurë të posaçme zbarkimi të pasagjerëve dhe pjesës së ekuipazhit, me qëllim izolimin e tyre dhe shmangien e përhapjes së mundshme të infeksionit.
Sipas autoriteteve franceze, pesë shtetas francezë që ndodhen në bord do të riatdhesohen sot me një fluturim mjekësor nga Tenerife drejt Francës. Ministritë franceze të Shëndetësisë dhe Punëve të Jashtme kanë bërë të ditur se transferimi do të kryhet në përputhje me protokollet sanitare dhe rekomandimet e Organizata Botërore e Shëndetësisë.
Pasi të mbërrijnë në Francë, pesë pasagjerët do të vendosen në karantinë spitalore për 72 orë, pasi OBSH i konsideron të gjithë pasagjerët e anijes si “kontakte me rrezik të lartë”. Gjatë kësaj periudhe do të kryhen vlerësime të plota mjekësore. Më pas, ata do të vazhdojnë izolimin në shtëpi për 45 ditë, nën monitorim shëndetësor të vazhdueshëm.
Autoritetet franceze kanë bërë të ditur gjithashtu se kujdesi dhe pritja e qytetarëve francezë do të organizohet nga Agjencia Rajonale e Shëndetësisë e rajonit Île-de-France.
Hantavirusi është një virus që transmetohet kryesisht nga brejtësit dhe në disa raste mund të shkaktojë sëmundje të rënda respiratore ose ethe hemorragjike. Transmetimi nga njeriu te njeriu mbetet i rrallë, por autoritetet po zbatojnë masa të forta parandaluese për të shmangur çdo rrezik të mundshëm.
