AGRON BRATAJ
Pas një viti të parë zhgënjyes mes dëmtimeve dhe gabimit të bujshëm ndaj Galatasarayt, anësori kosovar synon të rilindë gjatë fazës përgatitore nën drejtimin e Spallettit.
Ishte goditja e fundit e merkatos, transferimi i minutës së fundit i realizuar nga Damien Comolli, i cili e konsideronte Edon Zhegrovën si “qershia mbi tortë” të një merkatoje që, ndonëse kishte ngjallur entuziazëm te shumë vëzhgues, përfundoi duke rezultuar një dështim i madh.
Edhe vetë Zhegrova kontribuoi në këtë zhgënjim me paraqitje shumë të dobëta: zero gola, zero asistime dhe të paktën një gabim që do të mbetet gjatë në kujtesën e tifozëve të Juventusit dhe jo vetëm.
Comolli e transferoi nga Lille për 14.5 milionë euro, vetëm një muaj para skadimit të kontratës së tij. Megjithatë, futbollisti nuk ishte në gjendjen e duhur fizike, pasi po rikuperohej nga një ndërhyrje kirurgjikale për të zgjidhur problemet me pubalgjinë. Për këtë arsye iu desh shumë kohë që të ishte sërish në dispozicion të skuadrës.
Ndërkohë, tifozët shikonin videot e tij në YouTube, ku pothuajse çdo lojtar duket fenomen, dhe kujtonin paraqitjen e tij të shkëlqyer në një ndeshje të Ligës së Kampionëve, kur kishte vënë në vështirësi mbrojtjen e Juventusit.
Problemet taktike
Në periudhat e vështira, tifozët kapen pas çdo shprese. Madje edhe detaje të parëndësishme, si pantallonat e tij të pazakonta, u panë fillimisht me simpati. Por kjo simpati zgjati pak.
Që në ndeshjet e para u vu re se Zhegrova kishte vështirësi të kontribuonte në të dy fazat e lojës. Ai është një driblues shumë i talentuar, ndonjëherë edhe i tepruar, por në fazën mbrojtëse humbte topa me lehtësi dhe shpesh ekspozonte skuadrën ndaj rrezikut.
Me pak fjalë, ndikimi i tij dukej më shumë si ai i një lojtari të futbollit të vogël (5 me 5), sesa i futbollit të nivelit të lartë. Kjo ishte deri diku e kuptueshme pas nëntë muajsh mungesë për shkak të dëmtimit, por gjithsesi ndikoi negativisht te Juventusi.
Nuk është rastësi që trajneri Luciano Spalletti shpesh shfaqte pakënaqësi gjatë paraqitjeve të kosovarit, duke ngritur shpesh vetullën e ndonjëherë edhe tonin për mënyrën se si ai interpretonte rolin e tij në fushë.
