Nga Agron Brataj
Chelsea shkëlqeu në finalen e Kupës së Botës për Klube, duke mposhtur Paris Saint-Germain me rezultatin 3-0 në një përballje të zhvilluar në MetLife Stadium.
Ndeshja nisi me një ritëm të lartë, ku kampionët e Europës, PSG, dominuan fillimisht në fushë, duke kërkuar hapësira në zonën mbrojtëse të Chelsea-t. Megjithatë, në mesin e pjesës së parë, Chelsea kaloi në avantazh falë një kombinimi të bukur mes Gusto-s dhe Palmer-it. Ky i fundit, me një goditje të majtë tokazi, mposhti portierin Donnarumma dhe hapi serinë e golave.
Vetëm pak minuta më vonë, Palmer shënoi golin e dytë, i ngjashëm me të parin, duke ndezur atmosferën në stadium. Joao Pedro vulosi fitoren me një gol të tretë spektakolar, duke thelluar diferencën para pjesës së dytë.
Në pjesën e dytë, Chelsea kontrolloi lojën dhe menaxhoi rezultatin me qetësi, duke siguruar triumfin dhe trofeun e rëndësishëm. Nga ana tjetër, PSG u tregua zhgënjyes, për më tepër duke përfunduar ndeshjen me një lojtar më pak pas përjashtimit me karton të kuq të Neves.
Ky sukses shënon një kapitull të ri në historinë e Chelsea-t, duke i shtuar lavdinë klubit londinez në arenën ndërkombëtare.
