Nga Agron Brataj
Shërbimi i Sigurisë së Ukrainës (SBU) ka deklaruar se ka realizuar “një tjetër operacion special unik”, duke nxjerrë jashtë përdorimit një nëndetëse ruse në portin e Novorossiysk, në Detin e Zi. Sipas inteligjencës ukrainase, bëhet fjalë për herën e parë në histori që një nëndetëse shkatërrohet përmes një droni nënujor.
Në një deklaratë zyrtare, SBU njofton se dronët nënujorë Sub Sea Baby kanë shpërthyer një nëndetëse ruse të klasës 636.3 “Varshavyanka”. Si pasojë e shpërthimit, nëndetësja ka pësuar dëmtime kritike dhe është nxjerrë praktikisht jashtë funksionit.
ne nëndetëse ndodheshin katër platforma lëshimi për raketa lundruese ‘Kalibr’, të cilat armiku i përdor për të goditur territorin e Ukrainës”, thekson shërbimi i inteligjencës ukrainase.
Operacioni është realizuar në bashkëpunim mes Departamentit të 13-të Kryesor të Kundërzbulimit Ushtarak të SBU-së dhe Forcave Detare të Ukrainës. Sipas të dhënave zyrtare, kostoja e një nëndetëseje të klasës “Varshavyanka” është rreth 400 milionë dollarë amerikanë, ndërsa për shkak të sanksioneve ndërkombëtare aktuale, ndërtimi i një njësie të ngjashme mund të arrijë deri në 500 milionë dollarë.
Kjo klasë nëndetësesh njihet edhe me emrin “Black Hole” (Vrima e Zezë), për shkak të aftësisë së saj për të thithur tingujt dhe për të qenë shumë pak e dallueshme nga sonarët.
SBU rikujton gjithashtu se nëndetësja e goditur ishte e detyruar të qëndronte në portin e Novorossiysk, pasi operacionet e suksesshme të mëparshme me dronët detarë sipërfaqësorë Sea Baby kishin detyruar flotën ruse, përfshirë anijet dhe nëndetëset, të largoheshin nga gjiri i Sevastopolit në Krimenë e pushtuar përkohësisht.
Ky zhvillim shënon një fazë të re në luftën detare dhe përdorimin e teknologjisë së dronëve në konfliktin mes Ukrainës dhe Rusisë.
