Tensionet në Lindjen e Mesme janë përshkallëzuar pasi ushtria iraniane njoftoi se ka kryer sulme me dronë ndaj bazave ushtarake amerikane në Bahrein dhe Kuvajt.
Sipas një komunikate të ushtrisë iraniane, në Bahrein u goditën zona ku qëndrojnë avionët ushtarakë amerikanë, depoja e karburantit në bazën Sheikh Isa në jug të vendit, si dhe disa ura.
Ndërkohë, agjencia iraniane Tasnim raportoi se dy anije cisternë morën flakë pas shpërthimeve gjatë përpjekjes për të kaluar një fushë të minuar në pjesën jugore të Ngushticës së Hormuzit. Megjithatë, Komanda Qendrore e SHBA-së (CENTCOM) e mohoi këtë informacion në rrjetin X, duke e cilësuar si “lajm të rremë”.
Nga ana tjetër, Garda Revolucionare Iraniane (Pasdaran) deklaroi se Ngushtica e Hormuzit është “plotësisht e mbyllur”.
Kuvajti: Sulmet me raketa dhe dronë u zmbrapsën
Shtabi i Përgjithshëm i Forcave të Armatosura të Kuvajtit njoftoi se sistemet e mbrojtjes ajrore janë angazhuar për të neutralizuar sulme me raketa dhe dronë të lëshuar nga Irani.
Autoritetet theksuan se shpërthimet e dëgjuara nga banorët janë rezultat i interceptimit të këtyre sulmeve nga mbrojtja ajrore.
Për shkak të situatës, Aeroporti Ndërkombëtar i Kuvajtit pezulloi përkohësisht ngritjet dhe uljet e avionëve. Kompania Kuwait Airways njoftoi se shumica e fluturimeve do të riprogramohen.
Irani: Sulmuam baza amerikane në Bahrein dhe Kuvajt
Sipas mediave shtetërore iraniane, ushtria deklaroi se ka goditur bazën amerikane Sheikh Isa në Bahrein, ndërsa Garda Revolucionare tha se ka sulmuar edhe bazën amerikane Camp Arifjan në Kuvajt.
SHBA mohon raportimet për cisternat në flakë
CENTCOM deklaroi se lajmi për dy cisternat që thuhet se u përfshinë nga zjarri në Ngushticën e Hormuzit është i pavërtetë, duke kundërshtuar raportimet e mediave iraniane.
Irani: U goditën edhe objektiva në Jordani
Televizioni shtetëror iranian raportoi se forcat iraniane kanë sulmuar gjithashtu objektiva ushtarake në Kuvajt dhe Jordani, përfshirë kampin ushtarak Al-Adiri, bazën Ali Al-Salem në Kuvajt dhe bazën ajrore Al-Azraq në lindje të Jordanisë.
Viktima pas sulmeve amerikane në Iran
Sipas zëvendësguvernatorit të provincës iraniane Hormozgan, sulmet ajrore amerikane në këtë rajon kanë shkaktuar 3 të vdekur dhe 8 të plagosur.
Situata mbetet shumë e tensionuar dhe informacionet vazhdojnë të ndryshojnë. Disa prej pretendimeve të palëve janë ende të paverifikuara në mënyrë të pavarur.
