Nga Agron Brataj
Një vajzë e re nga Pordenone ra viktimë e një mashtrimi të mirëorganizuar në internet, duke humbur 2100 euro për një “pushim të ëndrrave” në Zanzibar, që në fakt nuk ekzistonte.
Oferta ishte tepër joshëse, 30% zbritje për një udhëtim të plotë, me akomodim dhe bileta vajtje-ardhje të përfshira.
Transaksioni u bë online, gjithçka dukej e besueshme faqja e internetit ishte e realizuar në mënyrë profesionale, dikush përgjigjej në telefon në mënyrë miqësore dhe bindëse. Por menjëherë pas dërgimit të parave, çdo kontakt u ndërpre. As biletat, as konfirmimet nuk mbërritën kurrë.
Shoqata e konsumatorëve ADOC, e cila mori denoncimin, njoftoi se kishte nisur verifikimet dhe zbuloi se pas kësaj “agjencie udhëtimi” fshihej një faqe interneti fiktive. Në disa raste, ekzistonte edhe një regjistrim formal në dhomën e tregtisë, por që në realitet i përkiste një bari apo restoranti në qytetin e Ankonës pa lidhje fare me turizmin.
Për më tepër, adresa fizike e pretenduar nga “agjencia” çoi tek një ndërtesë e braktisur dhe e rrënuar, që e vulos edhe më shumë natyrën mashtruese të skemës.
ADOC i bën thirrje qytetarëve të jenë jashtëzakonisht të kujdesshëm kur rezervojnë pushime online. Edhe pse interneti ofron komoditet të madh, rreziqet janë reale dhe në rritje. Zgjidhja më e sigurt, sipas tyre, mbetet vizita fizike në një agjenci udhëtimesh të licencuar, ku kontrolli dhe përgjegjësia janë shumë më të prekshme.
