Një studim i publikuar nga kompania amerikane OpenAI ka zbuluar se mbi një milion përdorues të ChatGPT dërgojnë çdo javë mesazhe që përmbajnë shprehje të qarta të qëllimeve apo planeve vetëvrasëse.
Sipas raportit, rreth 0,07% e përdoruesve aktivë në një javë tregojnë gjithashtu shenja të mundshme të problemeve të shëndetit mendor, si psikozë apo mani. Këto të dhëna dalin në një moment delikat për kompaninë, që po përballet me rritje të kritikave publike dhe ligjore, pas një padie të ngritur nga familja e një adoleshenti që u vetëvra pas përdorimit intensiv të ChatGPT.
Muajin e kaluar, Komisioni Federal i Tregtisë i SHBA (FTC) hapi një hetim të gjerë mbi kompanitë që zhvillojnë chatbot-e me inteligjencë artificiale, përfshirë OpenAI-n, me qëllim të vlerësimit të ndikimeve negative mbi fëmijët dhe adoleshentët.
Në reagim ndaj shqetësimeve, OpenAI ka deklaruar se versioni i fundit i modelit GPT-5 përfshin përmirësime të ndjeshme në sigurinë e përdoruesve, si dhe akses më të lehtë në linjat e ndihmës për kriza emocionale. Kompania ka njoftuar gjithashtu se ka angazhuar 170 mjekë dhe ekspertë të shëndetit mendor nga rrjeti i saj global për të ndihmuar në studimet dhe rregullimet e modelit gjatë muajve të fundit.
