Kiev, Ukrainë
Natën e kaluar, Rusia ndërmori një tjetër sulm ajror me dronë kundër kryeqytetit ukrainas Kiev dhe rajonit përreth, duke shkaktuar dëme dhe frikë në mesin e popullatës civile. Administrata Ushtarake Rajonale e Kievit raportoi përmes Telegramit, sipas agjencisë ukrainase Ukrinform se sistemet e mbrojtjes ajrore të Ukrainës u aktivizuan gjatë një alarmi ajror në kryeqytet dhe rrethinat e tij, për të zmbrapsur një “shi” dronësh të nisur nga jugu.
Në njoftim, autoritetet i bënë thirrje qytetarëve të qëndrojnë në strehimore derisa të dëgjohet sinjali zyrtar për përfundimin e alarmit. Dronët u identifikuan nga Forcat Ajrore të Ukrainës ndërsa lëviznin drejt veriut, në drejtim të Kievit.
Ndërkohë, një tjetër sulm rus goditi infrastrukturën hekurudhore në rajonin e Poltavës. Si pasojë e bombardimeve, disa seksione të rrjetit hekurudhor mbetën përkohësisht pa energji elektrike. Autoritetet u detyruan të përdorin lokomotiva rezervë me naftë për të mbajtur në funksion qarkullimin e trenave.
Sulmet shkaktuan zjarre në disa zona, duke lënë të plagosur një person. Për shkak të ndërprerjeve në energji dhe dëmeve në linjat hekurudhore, shumë trena pasagjerësh pësuan vonesa deri në tre orë, raportoi Ukrinform, duke cituar burime zyrtare ukrainase.
Kjo valë e re sulmesh vjen në vazhdën e tensioneve të pandërprera mes Rusisë dhe Ukrainës, me qytetarët civilë që mbeten të ekspozuar ndaj kërcënimeve të përhershme nga ajri.
