Nga Agron Brataj
Palacios de Sanabria, Spanjë
Futbollisti portugez i Liverpoolit, Diogo Jota, ka ndërruar jetë tragjikisht pas një aksidenti të rëndë automobilistik që ndodhi gjatë natës mes të mërkurës dhe të enjtes pranë komunës së Palacios de Sanabria, në Spanjë.
Sipas raportimeve të para, Jota ndodhej në një automjet së bashku me vëllain e tij André Jota, gjithashtu futbollist profesionist 26-vjeçar, kur automjeti doli nga rruga dhe shpërtheu në flakë.
Shërbimet mjekësore që mbërritën në vendngjarje nuk mundën të bënin asgjë për jetën e tij, duke konstatuar vdekjen në vend.
Zjarrfikësit spanjollë, të cilët ndërhynë në vendin e aksidentit, bëjnë të ditur se makina ka humbur kontrollin, ka dalë nga rruga dhe është përfshirë nga flakët. Ndërkohë, janë duke u zhvilluar hetime të mëtejshme për të përcaktuar saktësisht shkaqet e aksidentit.
Humbja e Diogo Jotës ka tronditur komunitetin sportiv ndërkombëtar, veçanërisht klubin Liverpool dhe tifozët e kombëtares portugeze, për të cilën Jota ishte një element kyç. Reagimet e para nga bota e sportit priten në orët në vijim, ndërsa dhimbja për këtë humbje të papritur është e madhe.
Një yll i futbollit është shuar shumë herët.
