Sicili–Kalabri,
Pas kalimit të ciklonit “Harry”, që goditi Mesdheun qendror në fund të janarit me erëra deri në 120 km/h, brigjet e Italisë së Jugut po përballen me një bilanc tragjik: të paktën 15 trupa migrantësh janë gjetur në ditët e fundit përgjatë vijës bregdetare. Organizatat humanitare paralajmërojnë se mbi 1000 persona rezultojnë të zhdukur në javët e fundit.
Trupat në brigjet e Kalabrisë dhe Sicilisë
Katër trupa janë zbuluar në bregun tirren të Kalabrisë, mes Amantea, Scalea dhe Tropea. Njëmbëdhjetë të tjerë janë gjetur në Sicilinë perëndimore, ndërmjet Trapani, Pantelleria dhe Marsala.
Sipas autoriteteve lokale, viktimat nuk kishin dokumente identifikimi dhe në disa raste as veshje, çka e vështirëson procesin e identifikimit. Dyshohet se trupat mund të kenë qëndruar për ditë apo javë në det, përpara se të nxirreshin në breg nga rrymat e fuqishme.
Tetë varka të nisura, vetëm një mbërriti
Gjatë ditëve të stuhisë, Roja Bregdetare italiane kishte lëshuar një alarm për tetë gomone të nisura nga Sfax, Tunizi, mes 14 dhe 21 janarit. Vetëm njëra arriti në Lampedusa, ndërsa për shtatë të tjerat nuk ka asnjë informacion. Këto të dhëna përbëjnë bazën e vlerësimeve për mbi 1000 të zhdukur në Mesdheun qendror.
Ekspertët detarë theksojnë se sistemi i rrymave të krijuara nga cikloni me shtytje nga jugu drejt veriut dhe më pas drejt lindjes mund të ketë zhvendosur trupat përgjatë Sicilisë perëndimore dhe më tej drejt brigjeve tirrene. Megjithatë, rindërtimi i saktë i trajektoreve mbetet shumë i ndërlikuar për shkak të rrymave të kryqëzuara dhe kushteve ekstreme të motit.
Akuza për mungesë operacionesh shpëtimi
Organizatat joqeveritare akuzojnë autoritetet italiane, tuniziane dhe malteze për mosnisjen në kohë të misioneve adekuate të kërkim-shpëtimit, duke argumentuar se shumë prej nisjeve kanë ndodhur pikërisht në ditët kur moti ishte përkeqësuar ndjeshëm.
“Zgjedhje të caktuara politike”
Në një letër publike drejtuar OJQ-së Mediterranea Saving Humans, kryeipeshkvi i Palermos, Corrado Lorefice, e përshkroi situatën si “ujëra të martirizuara të Mare Nostrum” dhe foli për një “masakër të konsumuar në heshtje, si pasojë e zgjedhjeve të caktuara politike”.
Ndërkohë, prokuroritë e Kalabrisë dhe Sicilisë kanë hapur hetime për të sqaruar rrethanat e mbytjeve, por mungesa e të mbijetuarve, dëshmive dhe mbetjeve të mjeteve lundruese e bën procesin hetimor veçanërisht të vështirë.
