Presidenti amerikan Donald Trump ka njoftuar në rrjetin e tij social Truth se ka firmosur ligjin me të cilin Kongresi i ka kërkuar Departamentit të Drejtësisë të bëjë publike të gjitha dokumentet e çështjes Jeffrey Epstein, financierit që vdiq në vitin 2019 në burg, ku ishte arrestuar nën akuzën për trafik seksual të të miturve.
“Kjo gënjeshtër e fundit”, shkruan Trump, “do t’u kthehet kundër demokratëve si të gjitha të tjerat”.
Në postimin e tij të gjatë në Truth, Donald Trump sulmon opozitën dhe paraardhësin e tij, Joe Biden.
“Jeffrey Epstein, i cili u akuzua nga Departamenti i Drejtësisë nën administratën Trump në vitin 2019 (jo nga Demokratët!), ka qenë demokrat gjithë jetën, ka dhuruar mijëra dollarë për politikanët demokratë dhe ka qenë thellësisht i lidhur me figura të shumta të njohura demokrate, si Bill Clinton (i cili udhëtoi në avionin e tij 26 herë), Larry Summers (i cili sapo është tërhequr nga shumë borde drejtues, përfshirë Harvardin), aktivisti i neveritshëm politik Reid Hoffman, lideri i pakicës Hakeem Jeffries (i cili i kërkoi Epstein-it të dhuronte për fushatën e tij pasi Epstein ishte akuzuar), deputetja demokrate Stacey Plaskett dhe shumë të tjerë”.
“Ndoshta”, shton ai, “e vërteta mbi këta Demokratë dhe lidhjet e tyre me Jeffrey Epstein do të zbulohet së shpejti”. Trump kujton se Biden “nuk ka dorëzuar asnjë dosje apo faqe lidhur me demokratin Epstein, dhe asnjëherë nuk ka folur për të”. Demokratët, vazhdon Presidenti, kanë “përdorur çështjen Epstein për të përpjekur të largojnë vëmendjen nga fitoret tona të jashtëzakonshme”. Lidhur me këtë, Trump përmend uljen e taksave, sigurimin e kufijve dhe “tetë luftërat e përfunduara”.
Edhe pse ka ardhur firma e Donald Trump për Epstein Files Transparency Act, ligji i miratuar nga Kongresi për publikimin e të gjitha dosjeve mbi Jeffrey Epstein, nuk është e sigurt që Kongresi do të mund të marrë të gjithë dokumentet.
Mbetet në diskrecionin e Departamentit të Drejtësisë, të drejtuar nga e besuara e Trump, Prokurorja e Përgjithshme Pam Bondi, të vendosë se çfarë do të deklasifikohet dhe çfarë jo. Por, sipas ligjit, do të merren në konsideratë vetëm informacionet që do të vlerësohen të ndjeshme për sigurinë personale dhe kombëtare, dhe jo ato që mund të ndikojnë te imazhi politik i personave të përmendur nga Epstein, përfshirë vetë presidentin.
Ligji kërkon, ndër pikat e tjera, dorëzimin në Kongres të një liste me emrat e të gjithë zyrtarëve të administratave dhe politikanëve të përmendur në dosje, ndërsa do të mbrohen emrat e viktimave dhe do të censohet i gjithë materiali video dhe fotografik i abuzimeve. Afatet për publikimin e dosjeve nuk janë ende të qarta.
Publikimin e komplikon gjithashtu nisja e hetimit mbi lidhjet e dyshuara mes ish-presidentit Bill Clinton dhe Epstein. Hetimi është urdhëruar nga Trump për Departamentin e Drejtësisë, i cili menjëherë ka emëruar prokurorin që do të merret me çështjen, Jay Clayton, nga distrikti i Nju Jorkut. Shumë dokumente mund të mbeten të klasifikuara pasi janë pjesë e procedurës së re hetimore.
