TIRANE-Sonte në orën 19:00 opozita do të zhvillojë protestën e tetë kombëtare përpara Kryeministrisë duke kërkuar sërish largimin e Edi Ramës nga pushteti, pasi e akuzojnë si të lidhur me krimin. Protesta e sotme vjen pas daljes së përgjimeve të reja nga gazeta gjermane ‘Bild’, ndërsa kreu demokrat Lulzim Basha tha se një nga arsyet pse PD ka zgjedhur të mos marrë pjesë në zgjedhjet vendore të 30 qershorit 2019, është se nuk mund të konkurrojnë politikisht – sipas tij me kriminelët.

“Ata që mendojnë ndryshe janë të verbër ose naivë. Edi Rama është i zhytur në krim. Edi Rama duhet të ikë, të bashkohemi për ta larguar”, theksoi ai.Ndërsa kryetarja e LSI, Monika Kryemadhi e sapo kthyer nga një operacion në Itali, tha dje se protesta e sotme është e qytetarëve të Tiranës.

Policia ka hartuar planin e masave për të shmangur incidentet dhe për të garantuar sigurinë, pasi në protestat e fundit të opozitës janë shënuar akte dhune ndaj policisë së shtetit dhe institucioneve.

Protesta e sotme e opozitës joparlamentare, ka shumë gjasa që të ketë episode të dhunshme edhe më të përshkallëzuara se në ato të mëparshmet.

Një informacion i tillë ka mbërritur tek agjencitë shqiptare të sigurisë nga agjencitë e huaja partnere, ndërsa SHBA dhe BE kanë paralajmëruar liderët e opozitës.

Leave a Reply

Adresa juaj email s’do të bëhet publike. Fushat e domosdoshme janë shënuar me një *

*