Nga Agron Brataj
Virusi i Nilit Perëndimor, 28 raste në Lazio \ virusi afër Romës. Rast edhe në një kalë në Catania
Dy të infektuar me sindromë neurologjike. Emergjenca në Campania. Teste të detyrueshme për dhuruesit e gjakut në Rajon
Virusi i Nilit Perëndimor ka mbërritur në afërsi të Romës. Janë regjistruar dy raste në provincë, në bregdetin jugor në zonën e Anzio dhe Nettuno. Në gjithë rajonin e Lazios janë konfirmuar shtatë raste të reja, sipas analizave të kryera nga Laboratori i Virologjisë i Institutit Kombëtar për Sëmundje Infektive “Lazzaro Spallanzani” IRCCS.
Nga 7 rastet e reja, 2 kanë shfaqur sindromë neurologjike, ndërsa 5 janë diagnostikuar me ethe të shkaktuara nga virusi i Nilit Perëndimor. Me këto konfirmime të fundit, numri i përgjithshëm i rasteve të diagnostikuara në vitin 2025 arrin në 28 në Lazio, 26 raste janë regjistruar në provincën e Latinës (përfshirë një paciente që ndërroi jetë javën e kaluar në spitalin e Fondit) dhe 2 raste në provincën e Romës.
Nga 28 rastet e konfirmuara:
11 pacientë janë aktualisht të shtruar në pavione të zakonshme për patologji të tjera,
3 janë lëshuar nga spitali,
11 janë në trajtim në shtëpi,
2 pacientë janë në kujdes intensiv,
1 person ka ndërruar jetë.
Në provincën e Latinës, komunat ku dyshohet se ka ndodhur ekspozimi janë: Aprilia, Cisterna di Latina, Fondi, Latina, Pontinia, Priverno, Sezze, Sabaudia.
Në provincën e Romës, komunat janë: Anzio dhe Nettuno. Dje është mbajtur një mbledhje e grupit drejtues të përbërë nga Rajoni i Lazios, Instituti Spallanzani, Instituti Zooprofilaktik i Lazios dhe Toskanës si dhe autoritetet shëndetësore lokale. Raporti i radhës do të publikohet të hënën, më 28 korrik.
“Nuk ka vend për alarm, por nevojitet kujdes dhe arsye për të mbrojtur fëmijët tanë”, është apeli i Vincenzo Tipo, drejtor i Njësisë së Pediatrisë së Urgjencës, të Ndihmës së Shpejtë dhe Terapisë Subintensive në Spitalin Pediatrik Santobono të Napolit, në lidhje me rastet e virusit të Nilit Perëndimor në disa zona të Italisë, veçanërisht në jug të Lazios dhe në Campania.
“Në shumicën e rasteve kujton Tipo virusi kalon pa simptoma ose shfaqet si grip i lehtë. Megjithatë, te fëmijët e vegjël dhe personat e brishtë, është e nevojshme një kujdes më i madh, pa panik”.
Në kanalet e saj sociale, spitali AORN Santobono-Pausilipon, spitali pediatrik më i madh në Jug të Italisë dhe qendër e specializuar, ndan “5 veprime të thjeshta për të mbrojtur më të vegjlit
-
Shmangni shëtitjet në agim dhe muzg (momente kritike për mushkonjat),
-
Vishini fëmijët me rroba të lehta dhe mbuluese, sidomos në zona të gjelbra ose me lagështi,
-
Përdorni rrjeta kundër mushkonjave në krevate, karroca dhe dritare,
-
Aplikoni repelentë të përshtatshëm për moshën pediatrike (nëse rekomandohen),
-
Eliminoni ujin e ndenjur (pjatat e luleve, kovët, burimet e papërdorura).
