Pas deklaratave të Myslim Murrizit se deputetët e opozitës së re flinin si “arixhinj” dhe nuk kishin shtëpi, kërkesat e tyre në drejtim të Kuvendit janë shtuar.

Ka qenë kreu i Ballit Kombëtar, Adriatik Alimadhi, ai që në mbledhjen e Konferencës së Kryetarëve të datës 14 tetor, i ka paraqitur Gramoz Ruçit problemin e mungesës së zyrave në rrethe, ku ata mund të presin qytetarët dhe se për këtë shkak, shpeshherë kanë rënë pre e sulmeve verbale nga qytetarë të ndryshëm.

Sipas Alimadhit gjatë takimeve që ai ka pasur është sulmuar  nga qytetarët, dhe për këtë i duhet që të ketë një zyrë stabël.

“Kur shkoj në takimet në zona, kemi një problem, pasi nuk kemi zyra, sekretarë. Është shumë i vështirë kontakti me qytetarët, duke parë edhe situatën politike. Sikurse e shpreha, situata politike është shumë e vështirë.

Unë shkoj në Vlorë dhe njerëzit më sulen si tradhtar e ku di unë çfarë tjetër. Ku do ulemi ne dhe ku do kontaktojmë, pasi nuk mund të ulemi në terren dhe nëpër kafe. Të dyja grupet parlamentare i kanë ndarë zyrat, për ne nuk ka asgjë. Të shikohet mundësia, sepse situata politike është problem për ne dhe jo për ju”, tha Alimadhi.

Ndërsa Ruçi i është përgjigjur se në çdo qark ka nga dy zyra në dispozicion të deputetëve, një për opozitën dhe një për maxhorancën dhe të gjithë deputetët mund t’i shfrytëzojnë ato.

“Lidhur me zyrat dhe sekretarët duhet të dini që në 12 qarqe janë 24 zyra. Së pari, në 24 zyra, 12 zyra i ka maxhoranca dhe 12 opozita”, ka thënë Ruçi.

Leave a Reply

Your email address will not be published. Required fields are marked *

*